பிப்ரவரி, 2012 க்கான தொகுப்பு

முதுகில் குத்தும் இந்திய அரசு ……


     பேச்சுவார்த்தை என்று வரவழைத்து விட்டு பின்னர் முதுகில் குத்துவது இந்திய அரசுக்கு ஒன்றும் புதிதல்ல. தமிழீழ விடுதலைப் போராட்ட வரலாற்றில் விடுதலைப் புலிகளின் இயக்கத்தலைவர் மேதகு.பிரபாகரன் அவர்களை அமைதிப் பேச்சுவார்த்தைக்கு வரும்பொழுது கொல்லச் சொல்லியது இந்த இந்திய அரசு, ஆனால் அமைதிப் பேச்சுவார்த்தைக்கு வரும் ஒருவரை என்னால் கொல்ல இயலாது என்று கூறினார் செனரல்.அர்கரத்சிங். அதே போலவே மாவோயிசப் போராளிகள். ஆசாத்தையும் கிசன்ஜீயையும், அமைதிப் பேச்சுவார்த்தை என்று சொல்லிக் கொண்டே பின்னரங்கில் சுட்டுக்கொன்றது இந்த இந்திய அரசு என்ற உண்மையைத் தெகல்கா வார இதழில் வெளியான புலனாய்வுக் கட்டுரைகள் அம்பலப்படுத்தின.  ஆந்திர மாநிலம் சிறீகாகுளம் மீனவர்களின், அறவழியிலான அனல்மின் நிலைய எதிர்ப்பு போராட்டத்தை இரவோடு இரவாக காவல்துறையை ஏவி சுட்டுத்தள்ளி போராட்டத்தை நசுக்கியது இந்திய அரசு, அதே போலவே கூடங்குளம் அணு உலை எதிர்ப்புப் போராட்டக்காரர்கள் மீது இப்பொழுது தங்களால் ”தேசபக்தி” வெறி ஊட்டப்பட்ட இந்துவெறி கும்பல்களைக் கொண்டு தாக்குதல் நடத்தி, பொய்வழக்கு போட்டுத் தன் உண்மை முகத்தை வெளிக்காட்டியுள்ளது இதே இந்திய அரசு. எல்லா போராட்டங்களையும் நாங்கள் முதுகில் தான் குத்துவோம் என்று மீண்டும் மீண்டும் நிரூபித்து வருகின்றது இந்த இந்திய அரசு.

     மக்களாட்சி (சனநாயகம்) என்ற வார்த்தைகூட தற்பொழுதுள்ள இந்திய அரசுக்குப் பிடிக்காத ஒன்று போல் தெரிகின்றது. தான் நினைத்த எதையும், யாரையும் பொருட்படுத்தாமல் செய்யும் சர்வாதிகாரத் தன்மை தான் இந்திய அரசின் ஒவ்வொரு செயலிலும் வெளிப்படுகின்றது. இதையே தான் கூடங்குள அணு உலைப் போராட்டம் தொடர்பான அரசின் செயற்பாடுகள் ஒவ்வொன்றும் நிரூபிக்கின்றன. மக்களின் முன்னால் பேச்சுவார்த்தை என்று பெயரளவில் ஒன்றை நடத்திக்கொண்டே பின்புறம் மிகவும் கேவலமான முறையில், முதலில் சாதியரீதியாக போராட்டத்தைச் சீர்குலைக்க முயற்சி செய்தது, அது தோல்வியைத் தழுவவே, அடுத்து மதரீதியான பிரிவினையைத் தூண்டிவிட்டு வகுப்புவாத கலவரங்களை உருவாக்க முயன்று அதுவும் தோல்வியைத் தழுவவே, கூடங்குளம் அணு உலை ”தேச வளர்ச்சிக்கு” முதன்மையானது என்று கூறி தேசபக்தி என்ற வெறியை மக்களுக்கு ஊட்டுகின்றது.

 

     தேசிய வளர்ச்சி என்பது வல்லரசுக் கனவுடன் தொடர்புள்ளது. ஆம், 50 விழுக்காட்டிற்கும் மேலான மக்கள் வறுமைக்கோட்டிற்குக் கீழிருக்கும் இந்தியா, ஐந்து வயதிற்குக் கீழ் உள்ள குழந்தைகளில் 42 விழுக்காட்டுக் குழந்தைகள் சரியான உணவு கிடைக்காமல் இருக்கும் இந்த நாட்டில், ஒரு முதலாளிக்குக் கிடைக்கும் பலகோடி உரூபாய் இலாபத்தை மக்கள் கணக்கில் எழுதும் ”ஒட்டுமொத்த தேசிய உற்பத்தி” (GDP) என்ற பொய்யான புள்ளிவிவரத்தை வைத்து நாடே வளர்வதாகவும், அடுத்து வல்லரசு ஆகப் போகின்றது என்றும் ஆருடம் கூறுகின்றது அரசு. மக்களுக்குத் தேவை வல்லரசு அல்ல மக்கள் நலம் நாடும் நல்லரசே. இந்தியா ஊட்டும் இந்த தேசபக்தி வெறி அண்டை நாடான பாகிசுதானுடன் விளையாட்டில் கூட இந்தியா தோற்கக்கூடாது என்ற அளவிலிருந்து, இப்பொழுது இசுலாமியர்களெல்லாம் தீவிரவாதிகள் என்ற பார்வைக்கு நம்மை கொண்டு சென்றுகொண்டிருக்கின்றது. உலக அரசியலால் ஒடுக்கப்பட்டுள்ள பாகிசுதான் நாட்டு மக்கள் தங்கள் தேச அரசியல்வாதிகளால் மேலும் ஒடுக்கப்படுகின்றார்கள். இந்த ஒடுக்கப்பட்ட மக்களை எல்லாம் நாம் எதிரிகளாகத் தான் பார்க்கவேண்டும் என்று கற்பிக்கின்றது இந்திய தேசபக்தி வெறி. அணு உலை எதிர்ப்புப் போராட்டக்காரர்களுக்குப் பின்னால் அந்நிய சக்தி இருக்கின்றது, அவர்களுக்கு ”வெளிநாட்டுப் பணம்” வருகின்றது என வழமை போல ஆதாரம் இல்லாத பொய்க்குற்றச்சாட்டுகளை அவர்கள் மேல் சுமத்திப் போராடும் மக்களை தேச விரோதிகளாகச் உருவகப்படுத்துகின்றது (சித்தரிக்கின்றது) இந்தியா. இதன் மூலம் போராடும் மக்களை மைய நீரோட்டத்திலிருந்து தனிமைப் படுத்த முயன்று வருகின்றது, 

    இதன் ஒரு பகுதியாகத் தான் தேசபக்தி வெறி ஊட்டப்பட்ட இந்து வெறிக்கும்பல் நான்காம் கட்ட பேச்சுவார்த்தைக்கு வந்த அணு உலை எதிர்ப்பாளர்களை மாவட்ட ஆட்சியாளர் அலுவலகத்தில் காவல்துறை முன்பே தாக்கிய நிகழ்வு நடந்தது.  தாக்கியது மட்டுமல்ல உலக வரலாற்றிலேயே முதல் முறையாக, தாக்கிய இந்து வெறிக்கும்பலிடம் சென்று மாவட்ட நீதிபதி உங்களுக்கு ஏதாவது குறை இருக்கின்றதா எனக்கேட்டு, அணு உலை எதிர்ப்பு போராட்டக்காரர்களின் மீது பொய் வழக்கு பதிவு செய்துள்ள நிகழ்வும் நடந்துள்ளது. ஆம், இனிமேல் உங்களை யாராவது வேண்டுமென்றே தாக்கி விட்டு, தடுத்த உங்களின் மீதும் புகார் கொடுத்து கைதும் செய்யக்கூடும்.

     மக்களின் முன்பு அணு உலைக்கு ஆதரவாக அரசின் முகவர்களான அப்துல்கலாம், மருத்துவர்.சாந்தா போன்றோர்களை வைத்து விளம்பரம் கொடுத்து வரும் அதே நேரத்தில், அரசு பின்புறமாக அணு உலை எதிர்ப்பாளர்களை நசுக்க எல்லாவிதமான கீழ்தரமான முயற்சிகளையும் செய்து வருகின்றது. இதன் முன்னுரையைத் தான் இந்து வெறிக்கும்பலின் தாக்குதலும், அணு உலை எதிர்ப்பாளர்கள் மீது பதிவு செய்யப்பட்ட பொய்வழக்கும் சுட்டிக்காட்டுகின்றது.

   சரி, கூடங்குளம் அணு உலைக்கு எதிரானப் போராட்டம் ‘அந்நிய நாட்டு’ உதவியுடன் நடப்பதாக அரசும், சில ஊடகங்களும் கூறுவது உண்மையென்றால் இறையாண்மை உள்ள அரசு என்ன செய்திருக்க வேண்டும்.

   அந்நாடுகளின் பெயர்களை வெளியிட்டு, அந்நாட்டு தூதரக அதிகாரியை அழைத்து “இந்திய நாட்டு வளர்ச்சிக்கும், அமைதிக்கும் பங்கம் விளைவித்ததற்காக கடும் கண்டனம் தெரிவித்திருக்கலாம், அப்படி செய்து  அந்நாடுகள் அளிக்கும் விளக்கம் திருப்திகரமானதாக இல்லாத சூழலில் அந்நாடுகளின் தூதரக அதிகாரிகளை அவர்கள் நாட்டிற்கு திருப்பி அனுப்பியிருக்கலாம் அல்லது இந்தியாவின் அணுக் கொள்கைக்கு எதிராக செயல் படும் இந்நாடுகள் உடனான பொருளாதார ஒப்பந்தங்களை குறிப்பாக அணுஉலைகள் அமைப்பது தொடர்பான ஒப்பந்தங்களை இரத்து செய்வதாக அறிவித்திருக்கலாம். உண்மையில் போராட்டக்காரர்களுக்கு வெளிநாடுகளில் இருந்து பணம் வருவதாக இருந்தால் இப்படி ஏதாவது ஒரு நடவடிக்கையின் மூலம் அதை தடுத்திருக்கலாம்.

  

   இதில் எது ஒன்றையும் செய்யாமல், வெறுமனே அந்நிய நிதி, அந்நிய சதி என்று கூறி, போராடும் மக்களின் மேல் ஒரு பகையுணர்ச்சியை மற்றவர்களுக்கு உருவாக்கும் வேலையை மட்டும் செவ்வனே செய்து வருகின்றது இந்திய அரசு. இதோ நடுவண் அரசின் பாதையில் மாநில அரசும் நிபுணர் குழுவும் அமைத்துவிட்டது, , அடக்குமுறைக்குப் பெயர்போன தற்போதைய மாநில அரசும் நடுவண் அரசின் வழியிலேயே பேச்சுவார்த்தை என்று பெயரளவில் காட்டிக்கொண்டு பின்புற வேலைகளை செய்யத்தொடங்கிவிட்டது. கூடங்குளம் பகுதியில் உள்ள காவல்துறை அதிகாரிகள் மாற்றம், தமிழக அரசு இந்திய அணுஆற்றல் கழகத்துடன் பேரம் பேசுதல், தமிழகத்தில் எட்டு மணி நேர மின்தடை (பாமர மக்களுக்குக் கூடங்குளத்தைத் திறக்கச் சொல்லி அழுத்தம் கொடுப்பதற்காக) என்பவை இதில் சில.

     நந்திகிராமில் டாட்டா ஆலையை எதிர்த்து மக்கள் போராடிய போது நக்சல்கள் என்றும், ஒரிசாவில் போசுகோ ஆலையை எதிர்த்து மக்கள் போராடிய பொழுது சட்டத்திற்கெதிரானது என்றும் அடக்குமுறையை ஏவிய அரசு, கூடங்குளத்தில் வெளிநாட்டு சதி என்ற போர்வையில் அடக்குமுறையை ஏவக் காத்திருக்கின்றது. எல்லா மக்கள் போராட்டங்களிலும் அரசு ஒரே சூத்திரத்தையே பின்பற்றி போராட்டத்தை நசுக்குகின்றது. முதலில் போராட்டக்காரர்களை பிரிக்க முனைவது, இல்லையென்றால் போராடுபவர்கள் நக்சல்கள், தேச விரோதிகள் என்ற முத்திரைக்குத்தி பொதுமக்கள் என்ற மைய நீரோட்டத்திலிருந்து பிரித்து, பின்னர் அடக்குமுறையை ஏவி ஒடுக்குவது. அதே போல எளிய மக்களின் போராட்டங்களை ஊடகங்கள் இருட்டடிப்பு செய்வதும் தொடர்ந்து வருகின்றது. கூடங்குள ஆதரவுப் பரப்புரையை தமிழக, இந்திய ஊடகங்கள் தொடர்ந்து செய்து, நாங்கள் அரசின் நான்காவது தூணல்ல அரசின் ஊதுகுழல்கள் என்று மீண்டுமொருமுறை நிரூபித்துள்ளன.

அணு உலையினால் ஏற்படும் விளைவுகள் தொடர்பாகவும், அரசின் மோசடிகள் தொடர்பாகவும் தொடர்ந்து பேசுவதும், எழுதுவதும், மின் பற்றாக்குறை தொடர்பாக பாமர மக்களிடம் உள்ள ஐயங்களை போக்குவதன் மூலமாகவும், போராடும் மக்களின் கைகளை வலுப்படுத்துவோம்.

மக்கள் போராட்டம் வெல்க !!!

-நற்றமிழன்.ப

தமிழர் காப்பு இயக்கம் (Save Tamils Movement)

 தரவுகள்:

1)   http://tamil.oneindia.in/news/2012/02/01/tamilnadu-case-filed-against-pushparayan-24-other-aid0175.html

இப்பதிவு கீற்று இணையதளத்தில் வெளிவந்துள்ளது.

நன்றி. கீற்று

Advertisements

காதல் – மார்க்ஸ், அம்பேத்கர், பெரியார்.


காதலுக்கு இலக்கணமாக

ரோமியோ- ஜீலியட் என்றால்

மார்க்ஸ்- ஜென்னி என்றேன்

அம்பிகாவதி- அமராவதி என்றால்

அம்பேத்கர்- இரமா பாய் என்றேன்

அவ்வளவு தானா என்றால்

என் அப்பாவும் – அம்மாவும் என்றேன் இறுதியாக……………

    ஆம் காதலித்து கரம் பிடித்த நாள் முதலாக இன்று வரை அவர்கள் வாழும் வாழ்க்கை எனக்கொரு நல்லதொரு பாடம். எனக்கு பிடித்த காதலர்களில் ஒரு இணையான என் அப்பாவிற்கும், அம்மாவிற்கும் இக்கட்டுரையை (முழுதும் பெரியார் எழுதியிருந்தாலும் கூட) சமர்ப்பிக்கின்றேன்….

பிப்ரவரி 14 “காதலர் தினம்”(Valentine’s Day) கடந்த சில ஆண்டுகளாக தலைப்பு செய்திகளில் வந்தது, காரணம் காதலர்கள் அல்ல, இந்து மதவெறி பிடித்த சில காலிகூடாரத்தின் தொல்லையால். ஆம் தாலியை கையில் எடுத்துக்கொண்டு அன்று பொதுவெளியில் பேசிக்கொண்டிருக்கும் ஆண்- பெண்களின் கைகளில் தாலியைக் கொடுத்து கட்ட சொல்லி வற்புத்தியதே இதன் காரணம். இது போன்ற காலிகளின் செயலைக் கண்டிக்கும் அதே நேரத்தில், என்னை அவள் காதலிக்கவில்லை என்று கூறி பெண்ணின் முகத்தில் திராவகம்(Acid) ஊற்றுவதும், காதலிக்க மறுக்கும் பெண்களை கொலை செய்வதும் தொடர்ந்து வருகின்றது. இதற்கெல்லாம் காரணம் சமூகம் காதல் என்ற சொல்லின் மேல் கட்டிவைத்த புனித தன்மையே. காதலென்றால் என்ன என்ற அடிப்படையே புரியாமல் நான் அவளை காதலிக்கின்றேன், அவளும் என்னை காதலிக்கவேண்டும் என்ற நினைப்பே பெண்ணின் முகத்தில் திராவகம் ஊற்றுவதிலும், கொலை செய்வதிலும் சென்று முடிகின்றது. இந்து காலிகளை கண்டிக்கும் அதே நேரத்தில் காதல் என்றால் என்ன என்ற அடிப்படை பற்றியதான புரிதல் தேவையாகின்றது. அதை எப்படி விவரிப்பது என்ற யோசிக்கும் பொழுதே, அதை அன்றே எங்களுக்காக எழுதி வைத்துள்ளார் தந்தை பெரியார். ஆம் அவர் அன்றே எழுதிய ”பெண் ஏன் அடிமையானால்” என்ற நூலில் உள்ள காதல் என்ற அத்தியாத்தையே இங்கு மறு பதிப்பு செய்யப் போகிறேன். சற்றே நீண்ட பதிவு எங்கும் குறைக்க வழியில்லை. வாசகர்கள் பொறுத்தாளவும்…

அன்பு, ஆசை, நட்பு என்பனவற்றின் பொருளைத்தவிர, வேறு பொருளைக் கொண்டதென்று சொல்லும்படியான காதன் என்னும் ஒரு தனித்தன்மை ஆண்-பெண்  சம்பந்தத்தில் இல்லையென்பதை விவரிக்கவே இவ்வியாசம் எழுதப்படுவதாகும். ஏனெனில், உலகத்தில் காதலென்பதாக ஒரு வார்த்தையைச் சொல்லி, அதனுள் ஏதோ பிரமாதமான தன்மையொன்று தனிமையாக இருப்பதாகக் கற்பித்து மக்களுக்குள் புகுத்தி அனாவசியமான ஆண்-பெண் கூட்டு வாழ்க்கையின் பயனை மங்கச்செய்து காதலுக்காகவென்று இன்பமில்லாமல், திருப்தியில்லாமல் தொல்லைப்படுத்தப்பட்டு வரப்படுகிறதை ஒழிக்க வேண்டும் என்பதற்காகவேயாகும்.

ஆமாம், காதலென்றாலென்ன? அதற்குள்ள சக்தி என்ன? அது எப்படி உண்டாகின்றது? அது எதுவரையில் இருக்கின்றது? அது எந்தெந்த சமயத்தில் உண்டாவது? அது எவ்வப்போது மறைகின்றது? அப்படி மறைந்து போய்விடுவதற்குக் காரணமென்ன? என்பதைப் போன்ற விசயங்களைக் கவனித்து ஆழ்ந்து யோசித்துப் பார்த்தால் காதலென்பதன் சத்தற்ற தன்மையும், உண்மையற்ற தன்மையும், நிச்சயமற்ற தன்மையும், அதை(காதலை)ப் பிரமாதப்படுத்துவதன் அசட்டுதனமும் ஆகியவைகள் எளிதில் விளங்கிவிடும்.

    ஆனால், அந்தப்படி யோசிப்பதற்கு முன்பே இந்தக் காதலென்கின்ற வார்த்தையானது இப்போது எந்த அர்த்தத்தில் பிரயோகிக்கப்படுகின்றது? உலக வழக்கில் அதெப்படி பயன்படுத்தப்பட்டு வருகின்றது? இவற்றிற்கென்ன ஆதாரம்? என்பவைகளைத் தெரிந்து ஒரு முடிவு கட்டிக்கொள்ள வேண்டியது அவசியமாகும்.

இன்றைய தினம் காதலைப்பற்றி பேசுகிறவர்கள், “காதலென்பது அன்பல்ல, ஆசையல்ல, காமமல்ல” என்றும், “அன்பு, நேசம், ஆசை, காமம், மோகம் என்பவை வேறு. காதல் வேறு” என்றும் ”அது ஒரு ஆணுக்கும், பெண்ணுக்கும் தங்களுக்குள் நேரே விவரித்துச் சொல்ல முடியாத ஒரு தனிக்காரியத்திற்காக ஏற்படுவதாகும்” என்றும், அதுவும் “இருவருக்கும் இயற்கையாய் உண்டாகக் கூடியதாகும்” என்றும், “அக்காதலுக்கு இணையானது உலகத்தில் வேறு ஒன்றுமில்லை” என்றும், “அதுவும் ஒரு ஆணுக்கு ஒரு பெண்ணிடமும், ஒரு பெண்ணுக்கு ஒரு ஆணிடமும் மாத்திரந்தான் இருக்க முடியும்” என்றும், அந்தப்படி “ஒருவரிடம் ஒருவருக்குமாக- இருவருக்கும் ஒரு காலத்தில் காதல் ஏற்பட்டுவிட்டால் பிறகு எந்தக் காரணங்கொண்டும் எந்தக் காலத்திலும் அந்தக் காதல் மாறவே மாறாது” என்றும், ”பிறகு  வேறொருவரிடம் காதல் ஏற்பட்டுவிட்டால் அது காதலாயிருக்க முடியாது; அதை விபச்சாரமென்றுதான் சொல்லவேண்டுமே ஒழிய, அது ஒருக்காலும் காதலாகாது” என்றும், மற்றும் “ஒரு இடத்தில் உண்மைக்காதல் ஏற்பட்டுவிட்டால், பிறகு யாரிடமும் காமமோ, விரகமோ, மோகமோ ஏற்படாது” என்றும் சொல்லப்படுகின்றன.

எனதருமை காதலர்கள் என் தந்தையும்- தாயும்…

எனதருமை காதலர்கள் என் தந்தையும்- தாயும்…

மேலும் இந்தக் காதல் காரணத்தினாலேயே ஒரு புருசன் ஒரே மனைவியுடனும், ஒரு மனைவி ஒரே புருசனுடனும்மாத்திரமிருக்க வேண்டியதென்றும் கற்பித்து, அந்தப்படி கட்டாயப்படுத்தியும் வரப்படுகின்றது.

   இதன் பலாபலன் எப்படியிருந்தாலும் இந்தப்படி சொல்கின்றவர்களை எல்லாம் உலகனுபமும், மக்கள் தன்மையின் அனுபவ ஞானமுமில்லாதவர்களென்றோ, அல்லது இயற்கைத் தன்மையையும் உண்மையையுமறியாதவர்கள் என்றோ, அல்லது உண்மையறிந்தும் வேறு ஏதாவதொரு காரியத்திற்காக வேண்டி வேண்டுமென்றே மறைக்கின்றவர்களென்றோதான் கருதவேண்டியிருக்கின்றது.

  அன்றியும், இமாதிரி விசயங்கலைப்பற்றி நாம் சொல்லும் மற்றொரு விசயமென்னவென்றால், இன்று பெரும்பான்மை மக்கள் ‘காதலன் காதலியாக’ வாழ்வதன் தன்மையெல்லாம் வேறு ஒருவர் ஜோடி பார்த்துச் சேர்த்ததும், பிள்ளைகளைப் பெறுவதற்கென்றும், வீட்டு வாழ்க்கையின் உதவிக்கென்றும், இயற்கை உணர்ச்சிக்கும், பரிகாரத்திற்கென்றும் சேர்க்கப்படுகின்ற ஜோடிகளாகத்தான் இருந்து வருகிறதே தவிர, தாங்களாக தங்கள் காதல் மிகுதியால், காதல் தெய்வத்தால் கூட்டுவித்தைக் காணுவது அருமையாக இருக்கிறது. இது எப்படி இருந்தாலும் எந்தக் காரணத்திற்கு ஆனாலும், ஒரு ஆணின் அல்லது ஒரு பெண்ணின் அன்பு, ஆசை, காதல், காமம், நட்பு, நேசம், மோகம், விரகம் முதலியவற்றைப்பற்றி மற்றொரு பெண்ணோ, ஆணோ மற்றும் மூன்றாமவர்கள் யாராயினும் பேசுவதற்கோ, நிர்ணயிப்பதற்கோ நிர்ப்பந்திப்பதற்கோ சிறுது கூட உரிமையே கிடையாது என்றும் சொல்லுகிறோம்.

இன்னும் சிறுது வெளிப்படையாய், தைரியமாய் மனித இயற்கையையும், சுதந்திரத்தையும், சுபாவத்தையும், அனுபவத்தையும் கொண்டு பேசுவதானால், இவையெல்லாம் ஒரு மனிதன் தனக்கு விருப்பமான ஒரு ஓட்டலில் சாப்பிடுவது போலவும், தனக்குப் பிடித்த பலகாரக்கடையில் பலகாரம் வாங்குவது போலவும், அவனுடைய தனி விருப்பத்தையும், மனோபாவத்தையும், திருப்தியையும்  மாத்திரமே சேர்ந்ததென்றும், இவற்றுள் மற்றவர்கள் பிரவேசிப்பது அதிகப்பிரசங்கித்தனமும், அனாவசியமாய் ஆதிக்கம் செலுத்துவதுமாகுமென்றுந்தான் சொல்லவேண்டும்.

   இப்படிச் சொல்லப்படுவதுகூட இவ்வளவு பெருமையையும், அணியையும், அலங்காரத்தையும் கொடுத்துப் பேசப்பட்ட காதல் என்பதை முன் குறிப்பிட்டபடி, அதென்ன? அதெப்படி உண்டாகி மறைகின்றது? என்பதை யோசித்துப் பார்த்தால் யாவருக்கும் சரியென்று விளங்கிவிடும். காதல் என்கின்ற வார்த்தை தமிழா? வடமொழியா? என்பது ஒருபுறமிருந்தாலும், தமிழ்மொடியாகவே வைத்துக்கொண்டாலும் அதற்கு ஆண், பெண் கூட்டுத்துறையில் அன்பு, ஆசை, ஆவல், நட்பு, நேசம், விரகம் என்பவைகளைத்தவிர, வேறு பொருள்கள் எங்கும் எதிலும் காணப்படவில்லை.

அன்றியும், அகராதியில் பார்த்தாலும் மேற்கண்ட பொருள்களைத் தவிர வடமொழி மூலத்தை அனுசரித்தால் காதலென்பதற்குக் கொலை, வெல்லல், வெட்டுதல், முறித்தல் என்கின்ற பொருள்கள்தான் கூறப்பட்டிருக்கின்றன. மற்றபடி, தனித்தமிழ் மொழியில் பார்த்தாலும், ஆண்-பெண் சேர்க்கை, கூட்டு முதலாகியவை சம்பந்தமான விசயங்களுக்கும், அன்பு, ஆசை, நட்பு, நேசம் என்பவைகளுக்கும் தவிர, வேறு தமிழ் மொழியிலும் காணப்படவில்லை. இவைகளுடன் காதலென்பதைச் சேர்த்துக் கொண்டாலும் இக்கருத்துகளையே தான் மாற்றி மாற்றி ஒன்ற்க்கு மற்றொன்றாகக் கூறப்படுகின்றதே தவிர, காதலுக்கென்று வேறு பொருள் காணப்படவில்லை.

  ஆதலால், இவைகளன்றிக் காதலென்பதற்கு வேறு தனி அர்த்தம் சொல்லுகிறவர்கள், அதை எதிலிருந்து, எந்தப் பிரயோகத்திலிருந்து கண்டுபிடித்தார்களென்பது நமக்கு விளங்கவில்லை.

   நிற்க, இப்படிப்பட்ட காதலானது ஒரு ஆணுக்கோ, பெண்ணுக்கோ எப்படியுண்டாகின்றது? இது தானாகவே உண்டாகின்றதா அல்லது மூன்றாவது மனிதனுடைய பிரவேசத்தைக் கொண்டு உண்டாகின்றதா? ஒரு சமயம் தானாகவே உண்டாவதென்றால், எந்தச் சந்தர்ப்பத்தில், எந்த ஆதாரத்தின் மீது என்பவைகளைக் கவனித்தால், பெண் ஆணையோ, ஆண் பெண்ணையோ தானே நேரில் பார்ப்பதாலும், அல்லது தான் மூன்றாவது மனிதர்களால் கேள்விப்படுவதாலும், உருவத்தையோ, நடவடிக்கையையோ, யோக்கிதையையோ வேறு வழியில் பார்க்க நேரிடுவதாலுமே தான் உண்டாகக்கூடுமே தவிர, இவைகளல்லாமல் வேறு வழியாகவென்று சுலபத்தில் சொல்லிவிட முடியாது.

    இந்தப்படியும் ஒரு ஆணுக்கு ஒரு பெண்ணிடத்தில் காதலேற்பட்டு, அந்தப் பெண்ணுக்கு அந்த ஆணிடத்தில் காதலேற்படாமல் போனாலும் போகலாம். இந்தப்படியே ஒரு பெண்ணுக்கு ஒரு ஆணிடத்தில் காதலேற்பட்டு அந்த ஆணுக்கு அந்தப் பெண்ணிடம் காதலேற்படாமல் போனாலும் போகலாம். ஆகவே எப்படி ஒரு மனிதன் ஒரு வஸ்து(பொருள், அல்லது மனிதர்கள்) பார்த்த மாத்திரத்தில், கேட்ட மாத்திரத்தில், தெரிந்த மாத்திரத்தில் அந்த வஸ்து தனக்கிருக்கலாம் – தனக்கு வேண்டும் என்பதாக ஆசைப்படுகின்றானோ, ஆவல் கொள்கின்றானோ அதுபோலவேதான் இந்தக் காதலஎன்பதும் ஏற்படுவதாயிருக்கின்றதே தவிர, வேறு எந்த வழியிலாவது ஏற்படுவதாயிருக்கின்றதே தவிர, வேறு எந்த வழியிலாவது ஏற்படுகின்றதா என்பது நமக்குப் புலப்படவில்லை.

  எப்படிப்பட்ட காதலும் ஒரு சுய லட்சியத்தை அதாவது தனது விருப்பத்தை- திருப்தியைக் கோரித்தான் ஏற்படுகின்றதே தவிர வேறில்லை என்பதும், காதலர்களென்பவர்களின் மனோபாவத்தைக் கவனித்தால் விளங்காமல் போகாது.

    அதாவது அழகைக்கொண்டோ, பருவத்தைக் கொண்டோ, அறிவைக் கொண்டோ, சொத்தைக் கொண்டோ, கல்வியைக்கொண்டோ, சங்கீதத்தைக் கொண்டோ, சாயலைக் கொண்டோ, பெற்ரோர் பெருமையையைக் கொண்டோ, தனது போக போக்கியத்திற்கு பயன்படுவதைக் கொண்டோ அல்லது மற்ற ஏதோவொரு திருப்தியையோ அல்லது தனக்குத் தேவையான ஒரு காரியத்தையோ குணத்தையோ கொண்டோ தான் யாரும் எந்தப் பெண்ணிடமும், ஆணிடமும் காதல் கொள்ள முடியும். அப்படிப்பட்ட அந்தக் காரியங்களெல்லாம் ஒருவன் காதல் கொள்ளும் போது அவன் அறிந்தது உண்மையாகவுமிருக்கலாம்- அல்லது அங்கிருப்பதாக அவன் நினைத்துக் காதல் கொண்டிருந்தாலுமிருக்கலாம்- அல்லது வேசமாத்திரத்தால் காட்டப்பட்ட ஒன்றினால் இருந்தாலுமிருக்கலாம்.

  உதாரணமாக ஒரு நந்தவனத்தில் ஒரு பெண் உல்லாசமாய் உலாவுவதை ஒரு ஆண் பார்க்கிறான். பார்த்தவுடன் அந்தப் பெண்ணும் பார்க்கிறாள். இரண்டு பேருக்கும் இயற்கையாய் கவனிப்புண்டாகிவிடது. பிறகு நீ யாரென்று இவர்களில் யாரோ ஒருவர் கேட்கிறார்கள். பெண் தன்னை ஒரு அரசனின் பெண்னென்று சொல்லுகிறால். உடனே ஆண் காதல் கொண்டுவிடுகிறான். இவனை யாரென்று கேட்கிறாள். இவன் தானொரு சேவகனுடைய மகனென்று சொல்கிறான். உடனே அவளுக்கு அசிங்கப்பட்டு வெறுப்பேற்பட்டுப் போய் விடுகிறது. இது சாதாரணமாய் நிகழும் நிகழ்ச்சி. இங்கு ஏற்பட்ட காதல் எதை உத்தேசித்தது?

   நிற்க, அவன் தன்னைச் சேவகன் மகனென்று சொல்லாமல், தானும் ஒரு பக்கத்துத் தேசத்து இராஜகுமாரெனென்று சொல்லிவிட்டால் அவளுக்கு அதிகக் காதலேற்பட்டு, ‘மறு ஜென்மத்திலும்’ இவனைவிட்டுப் பிரியக்கூடாதென்று கருதிவிடுகிறாள். 4 நாள் பொறுத்த பின்பு, தான் காதல் கொண்டவன் அரச குமாரனல்லவென்றும், சேவகன் மகனென்றும் அறிந்தாளென்றும் வைத்துக் கொள்வோம். இந்த நிலையில் அந்தக் காதல் அப்படியே இருக்குமா? அல்லது இருந்தாக வேண்டுமா? என்பதை யோசித்துப் பார்த்தால் காதேற்படும் தன்மையும், மறுக்குந்தன்மையும் விளங்கும். இந்தப்படிக்கே ஒரு பெண்ணை நோயில்லாதவளென்று கருதி ஒருவன் காதல் கொண்ட பின் நோயுடையவள் என்று தெரிந்து, அல்லது ஒரு தாசி என்று தெரிந்து அல்லது தன்னை மோசம் செய்து தன்னிடம் உள்ள பொருளை அபகரிப்பவள் என்று தெரிந்து, இதுபோலவே இன்னமும் தான் முதலில் நினைத்ததற்கு அல்லது தனது நன்மைக்கும், திருப்திக்கும், விருப்பத்திற்கும் எதிராக தான் எதிர்பார்க்காத கெட்ட காரியத்திற்கு அனுகூலமாகவோ ஏற்பட்டுவிட்டதாய் தெரிந்துவிட்டால் அந்தக் காதல் பயன்படுமா?அதை எவ்வளவு தான் கட்டிபோட்டாலும் அது மாற்றமடையாமல் இருக்க முடியுமா? என்பவைகளை யோசித்தால் உண்மைக் காதலின் நிலையற்ற தன்மை விளங்காமல் போகாது.

நிற்க, உண்மைக் காதல் என்பது ஒருவரை ஒருவர் பார்த்தவுடன் உண்டாகுமா? அல்லது கொஞ்ச நாளாவது பழகியவுடன் உண்டாகுமா? பார்த்ததும் ஏற்பட்ட காதல் உயர்வானதா? அல்லது சிறிய நாள் பழகிய பின் ஏற்படும் காதல் உயர்வானதா? சரீரத்தைக்கூடச் சரியாய்த் தெரிந்து கொள்ளாமல் தூர இருந்து பார்ப்பதாலேயே ஏற்படும் காதல் நல்லதா? அல்லது சரீரத்தின் நிலை முதலியவைகள் தெரிந்து, திருப்தியடைந்த காதல் நல்லதா? என்பவைகளைக் கவனிக்கும் போது, சரீர மாறுபாட்டாலும் பொருத்தமின்மையாலும் ஏன் எப்படிப்பட்ட உண்மைக்காதலும் மாறமுடியாது என்பதற்கு என்ன விடை பகரமுடியும்? அல்லது உண்மையாகவே ஒருத்தன் ஒருத்தியுடன் காதல் கொண்டுவிட்டால், ஒருத்தி தப்பாய் அதாவது வேறு ஒருவனிடம் காதல் கொண்டுவிட்டதாகக் கருத நேர்ந்தால் அது பொய்யாகவோ, மெய்யாகவோ இருந்தாலும் தன் மனதுக்குச் சந்தேகம்படும்படியாய் விட்டால், அப்போது கூட காதல் மாறாமல் இருந்தால் தான் உண்மைக்காதலா? அல்லது தன் மனம் சந்தேகப்பட்டால் அதிருப்தி அடைந்தால் நீங்கிவிடக்கூடிய காதல் குற்றமான காதலா என்பதற்கு என்ன மறுமொழி பகர முடியும்?

  காதல் கொள்ளும்போது காதலர்கள் நிலைமை, மனப்பான்மை, பக்குவம், இலட்சியம் ஆகியவைகள் ஒரு மாதிரியாக இருக்கலாம். பிறகு, கொஞ்ச காலம் கழிந்த பின்பு இயற்கையாகவே பக்குவம், நிலைமை, இலட்சியம் மாறலாம். இந்தச் சந்தர்ப்பத்தில்  ஒருவரையொருவர் பிரிவதும், வெறுப்பதும் காதலுக்கு விரோதமாகுமா? விரோதமாகுமானால் அப்படிப்பட்ட காதல் பயன்படுமா? விரோதமில்லையென்றால் ஒருவர் ஞானியாகி துறவியாகிவிட்டால், மற்றவரை விட்டுப் பிரிந்து செல்வது காதலுக்கு விரோதமாகுமா? என்பதும் கவனித்தால், காதலின் யோக்கியதை விளங்காமல் போகாது. பொதுவாக மனித ஜீவன் ஒன்றைப் பார்த்து, நினைத்து ஆசைப்படுவதும், ஒன்றிடம் பலவற்றினிடம் அன்பு வைப்பதும், நேசம் காட்டுவதும் இயற்கையேயாகும்.

  அது போலவே, மனிதனுக்கு தானாகவே எதிலும் விரக்தி வருவதும், வெறுப்புக் கொள்வதும், பிரிவதும் இயற்கையாகும். பலவீனமாய் இருக்கும்போது ஏமாந்துவிடுவதும், உறுதி ஏற்பட்ட பின்பு தவறுதலைத் திருத்திக்கொள்ள முயற்சிப்பதும், அனுபவ ஞானமில்லாதபோது கட்டுப்பட்டுவிடுவதும், அனுபவம் ஏற்பட்ட பிறகு விடுதலை செய்துகொள்ள முயல்வதும் இயற்கையல்லவா?

   உதாரணமாக ஒரு வாலிபன் ஏமாந்து ஒரு தாசியிடம் காதல் கொண்டு சொத்துகளையெல்லாம் கொடுத்து விடுவதைப் பார்க்கிறோம். அந்த வாலிபனுக்கு அந்தத் தாசியிடம் ஏற்பட்டது காதல் என்பதா? அல்லது காமம் என்பதா? அறிவீனத்தால் அடைந்த ஏமாற்றம் என்பதா? அதே தாசி சில சமயத்தில் தனக்குத் தாசித் தொழில் பிடிக்காமல், இந்த வாலிபனிடமே  நிரந்தரமாயிருந்து காலத்தை கழிக்கலாம் என்று கருதிவிடுவதைப் பார்க்கின்றோம். ஆகவே, இந்தத் தாசி கொண்டது காதலா? அல்லது வாழ்க்கைக்கு ஒரு சௌகரியமான வழியா? இதை வாலிபன் அறியாமல் நேசத்தை வளர்த்துக்கொண்டே வந்தால் ஒத்த காதலாகிவிடுமா? இப்படியெல்லாம் பார்த்தால் காதல் என்பது ஆசை, காமம், நேசம், மோகம், நட்பு, அறிவீனம், அனுபவமின்மை, ஏமாற்றம் என்பவைகளைவிடச் சிறிது கூட சிறந்தது அல்ல என்பது விளங்கிவிடும்.

     அதற்கு ஏதோதோ கற்பனைகளைக் கற்பித்து, ஆண்-பெண்களுக்குள் புகுத்திவிட்டால், ஆண் பெண்களும் தாங்கள் உண்மையான காதலர்கள் என்று காட்டிக் கொள்ளவேண்டுமென்று கருதி- எப்படிப் பக்திமானென்றால், இப்படி இப்படியெல்லாமிருப்பான் என்று சொல்லப்பட்டதால், அநேகர் தங்களைப் பக்திமான்கள் என்று பிறர் சொல்லவேண்டுமென்று கருதிச் சாம்பல் பூச்சுப் போடுவதும், சதா கோயிலுக்குப் போவதும், பாட்டுகள் பாடிக் கண்ணீர் விட்டு விழுவதும், வாயில் சிவ சிவ, இராம இராம என்று கூறிக் கொண்டிருப்பதுமான காரியங்களைச் செய்து, பக்திமான்களாகக் காட்டிக் கொள்கிறார்களோ அதுபோலும், எப்படிக் குழந்தைகள் தூங்குவது போல் நடித்தாலும், பெரியவர்கள் குழந்தைகளின்  தூக்கத்தைப் பரிசோதிப்பதற்காக “தூங்கினால் கால் ஆடுமே” என்று சொன்னால், அந்தக் குழந்தை தன்னைத் தூங்குவதாக நினைக்கவேண்டுமென்று கருதி, காலைச் சிறிது ஆட்டுமே அதுபோலும், உண்மையான காதலர்களானால் இப்படியல்லவா இருப்பார்கள் என்று சொல்லிவிட்டால், அல்லது அதற்கு இலக்கணம் கற்பித்துவிட்டால், அதுபோலவே காதலர்கள் என்பவர்களும் நடந்து, தங்கள் காதலைக் காட்டிக் கொள்ளுகிறார்கள். இதற்காகவே அவர்கள் இல்லாத வேசத்தைப் போடுகிறார்கள். அதை விவரிப்பது என்றால் மிகவும் பெருகிவிடும்.

     ஆகவே, ஆசையை விட, அன்பைவிட, நட்பைவிட, காதல் என்பதாக வேறு ஒன்றும் இல்லை என்றும், அந்த அன்பு, ஆசை, நட்பு ஆகியவைகள் கூட மக்களுக்கு அஃறிணைப்   பொருட்கள் இடத்திலும், மற்ற உயர்திணைப் பொருட்களிடத்திலும் ஏற்படுவதுபோல் தானே ஒழிய, வேறில்லையென்றும், அதுவும் ஒருவருக்கொருவர் அறிந்து கொள்வதிலிருந்து, நடவடிக்கையிலிருந்து, யோக்கியதையிலிருந்து, மனப்பான்மையிலிருந்து, தேவையிலிருந்து, ஆசையிலிருந்து உண்டாவதென்றும், அவ்வறிவும், நடவடிக்கையும், யோக்கியதையும், மனப்பான்மையும், தேவையும், ஆசையும் மாறக்கூடியதென்றும், அப்படி மாறும்போது அன்பும், ஆசையும், நட்பும் பொருளாகக் கொண்ட காதல் கூடாதென்றோ, அப்படிப்பட்டதில்லை என்றோ சொல்லவரவில்லை.

     ஆனால், அன்பும், ஆசையும், நட்பும் மற்றும் எதுவானாலும் மன இன்பத்திற்கும் திருப்திக்குமேயொழிய, மனதிற்குத் திருப்தியும் இன்பமும் இல்லாமல் அன்பும், ஆசையும், நட்பும் இருப்பதாகக் காட்டுவதற்காக அல்ல என்பதை எடுத்துக்காட்டுவதற்காகவே இதை எழுதுகின்றோம். இதுவும் ஏன் எழுத வேண்டியாயிற்று என்றால், மற்றவர்கள் திருப்தியிலும், மகிழ்ச்சியிலும் நுழைந்து கொண்டு, தொட்டதெற்கெல்லாம் ‘இது காதலல்ல’, ‘அது காதலுக்கு விரோதம்; ‘அது காம இச்சை’, ’இது விபச்சாரம்’ என்பது போன்ற அதிகப் பிரசங்கித்தனமான வார்த்தைகளை ஒருவிதப் பொறுப்புமில்லாதவர்கள் எல்லாம் கூறுவதால் அப்படிப்பட்டவர்கள் கூற்றையும், கூறும் காதலையும் சற்றுப் பார்த்துவிடலாம் என்றே இதைப்பற்றி எழுதலானோம்……..

    —–தந்தைப் பெரியார்

(பெண் ஏன் அடிமையானால் என்ற நூலிலிருந்து)……………

ஆதலினால் காதல் செய்வீர் …………

%d bloggers like this: