மார்ச், 2012 க்கான தொகுப்பு

அன்று முள்ளிவாய்க்கால்… இன்று கூடங்குளம்…


      முள்ளிவாய்க்காலில் எப்படி ஈழத்தமிழர்களை கடல், வான், தரை என்று மூன்று பக்கங்களிலும் நெருக்கி சிங்கள ராணுவம் வன்முறையை ஏவியதோ அதே போலவே கூடங்குளத்தில் அணு உலையைத் திறக்கின்றோம் என்ற போர்வையில் கூடங்குளம், இடிந்தகரை அதைச் சுற்றியுள்ள மக்களை காவல்துறை தரை வழியாகவும், கடலோர காவல்துறை கடல்வழியாகவும், கடற்படையின் உலங்கு வானூர்ந்திகள் வான்வழியாகவும் மக்களை நெருக்கி வன்முறையை ஏவ ஏதுவாக உள்ளன. கூடங்குளம், இடிந்தகரை கிராமங்கள் தமிழ்நாட்டில் இருந்தாலும் மற்ற பகுதிகளில் உள்ளவர்கள் அங்கு உள்ளே செல்லவோ, அந்த பகுதி மக்கள் வெளியே செல்லவோ முடியாதபடி சிறைவைக்கப்பட்டுள்ளார்கள். மக்களுக்குத் தேவையான அத்தியாவசியப் பொருட்களான பால், உணவு பொருட்கள் கூட இந்த பகுதிகளுக்குள் நுழைய அனுமதி மறுக்கப்பட்டுள்ளது. மின்சாரம் துண்டிக்கப்பட்டுள்ளது, அடுத்து தண்ணீர் வழங்கலையும் துண்டிக்கத் திட்டமிட்டுவருகின்றனர் அதிகாரிகள். 144 தடையுத்தரவும் அங்கு அமலில் இருக்கின்றது. மூன்று ஆண்டுகளுக்கு முன்பு நடந்த முள்ளிவாய்க்காலே நம் நினைவை விட்டு இன்னும் அகலாத நிலையில் இந்திய,தமிழக அரசுகள் அதே போன்றதொரு நிகழ்வை நிகழ்த்த இருக்கின்றன.

kundankulam_police

              இனப்படுகொலை இலங்கை அரசு தமிழர்களை படுகொலை செய்ய பிரயோகப்படுத்திய அதே “மாதிரி வடிவம்” இன்று ஒரு அமைதிவழிப் போராட்டத்தை ஒடுக்க மத்திய, மாநில அரசுகளால் பயன்படுத்தப்பட்டு வருவதென்பது மறுக்கமுடியாத உண்மையாகும்.      

                     மத்திய அரசு தொடக்கம் முதலே இந்தப் போராட்டத்தின் மீது பலவிதமான பொய்க்குற்றச்சாட்டுகளை வீசி, போராடும் மக்களை மைய நீரோட்டத்திலிருந்து தனிமைப்படுத்த தொடர்ந்து முயன்றது. அதன் நீட்சியாகத் தான் “அந்நிய நிதி”, “அந்நிய சதி” போன்ற ஆதாரமற்ற குற்றச்சாட்டுகளை நாரயணசாமி தொடங்கி பிரதமர் மன்மோகன் வரை கூறி, போராடும் மக்களை இந்திய மக்களிடமிருந்து அந்நியப்படுத்தினார்கள். ஆனால் இன்று வரை இதற்கு எந்தவொரு ஆதாரமும் மக்கள் மன்றத்தின் முன்னால் வைக்கப்படவில்லை. தமிழக அரசோ செயற்கையான மின்தட்டுப்பாட்டை உருவாக்கி போராடும் மக்களை தமிழக மக்களிடமிருந்து தனிமைப்படுத்தியது. 

               தமிழகம் இருளில் மூழ்கியிருப்பதற்கு அணு உலை எதிர்ப்பு போராட்டக்காரர்கள் தான் காரணம் என்ற சித்திரம் தமிழக மக்களின் பொது புத்தியில் நன்கு பதியவைக்கப்பட்டுவிட்டது. இதற்கு ஊடகங்களின் இராஜ விசுவாசம் மிக முக்கியமான காரணமாகும். இந்த நிலையில் தான் நேற்று கூடங்குளம் அணு உலை செயல்படுவதற்கு தமிழக அமைச்சரவை அதாவது முதல்வர்.செயலலிதா ஒப்புதல் கொடுத்தார். கடந்த ஐந்து ஆண்டுகளில் செயலலிதா அதிகமாக மாறிவிட்டார், முன்னர் நேருக்கு நேர் மக்களின் எதிரியாக இருந்தவர், இப்பொழுது கூடிக் கவிழ்க்கும் துரோகிகளின் பட்டியலில் சேர்ந்துவிட்டார். ஒப்புதல் கொடுப்பதற்கு சில வாரங்களுக்கு முன்னரே கூடங்குளம் பகுதியைச் சேர்ந்த முக்கிய காவல்துறை அதிகாரிகள் இடமாற்றம் செய்யப்பட்டு தனக்குத் தோதான அதிகாரிகளை அங்கு பணியமர்த்தினார். 

             இப்பொழுது நெல்லை, குமரி மாவட்டங்களில் உள்ள எல்லா மீனவ கிராமங்களிலும் முழுக்க காவல்துறையினர் குவிக்கப்பட்டுள்ளனர். ஒவ்வொரு கிராமமும் வேலி வைத்து கிராமத்திற்கு உள்ளே வரவோ, வெளியோ செல்லவோ முடியாமல் தடுக்கப்பட்டுள்ளது. தங்கள் சொந்த நாட்டிலேயே அம்மக்கள் தனிமைப்படுத்தப்பட்டுள்ளனர். கூடங்குளத்தைச் சுற்றியுள்ள எல்லா மீனவ கிராமங்களும் முள்ளிவாய்க்காலைப் போல காவல் துறையால் சூழப்பட்டுள்ளது. பால், தண்ணீர், காய்கறிகள் போன்ற அத்தியாவசிய பொருட்கள் கூட இக்கிராமங்களுக்குள் அனுமதிக்கப்படுவதில்லை (மருந்து பொருட்களையும், உணவுப் பொருட்களையும் போர்க்கருவிகளாக கொண்டு எப்படி ஈழத்தமிழர்கள் இனப்படுகொலை செய்யப்பட்டார்கள் என்பது இங்கு நினைவு கூரத்தக்கது). மேலும் இங்கு 144 தடையுத்தரவும் போடப்பட்டுள்ளது. இப்பொழுதுவரை 15,000 காவல்துறையினர் இக்கிராமங்களைச் சுற்றிவளைத்துள்ளனர். இடிந்தகரை கிராமம் காவல்துறை, கடலோர காவற்படை, உலங்கு வானூர்தி என எல்லாபுறங்களிலும் முற்றுகையிடப்பட்டுள்ளது. 

binayak_sen_600

                            தமிழக அமைச்சரவை ஒப்புதல் அளித்த மறுநொடி போராடும் மக்களில் இருநூறுக்கும் அதிகமானவர்கள் கைது செய்யப்பட்டார்கள். இவர்களில் 11பேர் மீது இந்திய ஒன்றியத்திற்கு எதிராக போர் தொடுத்த பிரிவிலும், தேசத் துரோக பிரிவிலும் பொய் வழக்குகள் தொடுக்கப்பட்டுள்ளது. மீதமுள்ளவர்கள் மீது சட்டத்திற்கு புறம்பாக ஒன்றுகூடுதல் பிரிவில் பொய் வழக்குகள் பதியப்பட்டுள்ளது. இதில் பனிரெண்டாம் வகுப்பு தேர்வெழுதும் 2 பெண் மாணவிகள் உட்பட 43 பேர் பெண்களாவர். இவர்களனைவரையும் திருச்சி சிறையில் அடைத்துள்ளார்கள். 

                                    இந்த செய்திகள் எதையுமே ‘மக்களாட்சியின் நான்காவது தூணான’ ஊடகங்கள் ஒரு சிலவற்றைத் தவிர வேறெதிலும் வெளிவரவில்லை. மட்டுமின்றி, காவல்துறை அதிகாரிகளையும், வாகனங்களையும் மக்கள் தாக்குகின்றனர் என்ற காவல்துறையின் வதந்தியை தொடர்ந்து ஒளிபரப்பி இம்மக்களின் மீது வன்முறையை பிரயோகிப்பதற்கான பொது புத்தியை உருவாக்கி தொடர்ந்து தங்களது இராஜவிசுவாசத்தை வெளிப்படுத்தி வருகின்றன.

                                                              காவல் துறை அதிகாரியான இராஜேஸ்குமார் சன் செய்திகள் தொலைக்காட்சியில் பேசியது, கோத்தபயாவை நினைவூட்டியது. உதயகுமாரும், ஒரு சிலருமே அங்கு போராடிவருவதாகவும், மற்றவர்களெல்லாம் அணு உலைக்கு ஆதரவாக இருப்பது போன்ற ஒரு பொய்யான பிம்பத்தை உருவாக்குகின்றார், இதையே தான் கோத்தபயாவும் சொன்னார். பிரபாகரனாலும், புலிகளாலும் மட்டுமே பிரச்சனை என்றும் அவர்கள் மக்களை பணயமாக பிடித்து வைத்துள்ளார்கள் என்றும் மக்களை மீட்கும் மனிதாபிமான போரை நடத்துவதாகவும் கூறினார். அதுவே தான் இங்கும் நடைபெறுகின்றது. மனிதாபிமானப் போர்களில் மனிதர்களைத் தான் காணவில்லை.

                     உதயகுமாரை தனியே உங்களிடம் ஒப்படைக்க மாட்டோம், 200 பேருந்துகளையும், இரண்டு காவல்துறையினரையும் அனுப்பி வையுங்கள் நாங்களும் கைதாகின்றோம் என்பது அங்குள்ள மீனவ மக்களின் கோரிக்கை. மின்சாரம் இல்லாததால் எல்லா மீனவ கிராமங்களும் இருளில் மூழ்கியுள்ளன. இடிந்தகரையில் குண்டு மட்டும்தான் வீசப்படவில்லை.  குறிப்பிட்ட மொழி, மதம், அல்லது இனக்குழுவைச் சேர்ந்தவர்கள் மீது அரசோ, அதிகாரபீடங்களோ காட்டும் பாரபட்சமான நடவடிக்கை, துவேசம் அல்லது தாக்குதல் இதில் எந்த ஒன்று நடந்தாலும் அது இனக்கொலைக்கு சமம். இப்பொழுது சொல்லுங்கள் இடிந்தகரை இப்பொழுது முள்ளிவாய்க்கால் தானே.. நாளை இடிந்தகரை என்னவாக இருக்கும்?

                          ஈழத்தமிழ் மக்களை இனப்படுகொலை செய்வதற்கு இலங்கை உபயோகித்த மக்களை தனிமைப்படுத்துதல், பின்னர் பயங்கரவாதி அல்லது வெளிநாட்டில் காசு வாங்கிக்கொண்டு இங்கு போராடுகின்றார்கள் என்று முத்திரை குத்துவது, ஊடகங்களை அந்தப் பகுதியிலிருந்து வெளியேற்றுவது, மற்ற பகுதியினரை அந்தப் பகுதிக்குள் வரவிடாமல் தடை செய்வது, மக்களின் மீது மிகவும் கடுமையான வன்முறையை ஏவுவது என்ற வழிமுறையைத தான் இந்திய/தமிழக அரசுகள் அமைதிவழியில் போராடிவரும் மக்களின் மேல் பயன்படுத்திவருகின்றது.

koodanakulam_620

                                            இன்று கூடங்குளம் மக்களின் மேல் ஏவப்பட்டிருக்கும் வன்முறை, மனித உரிமை மீறல்கள், நம்மை நோக்கி நீள்வதற்கு நீண்ட நேரம் தேவைப்படாது, மேலும் கூடங்குளத்தால் கிடைக்கும் மிகக்குறைந்த பட்ச மின்சாரம் கூட மின்வெட்டால் பாதிக்கப்பட்டுள்ள சிறுகுறு தொழில்களுக்கோ, விவசாயத்திற்கோ, வீட்டு உபயோகத்திற்கோ கொடுக்கப்படப் போவதில்லை, வழமை போல முதலில் கவனிக்கப்படுவது பன்னாட்டு நிறுவனங்களும், வணிக வளாகங்களுக்குமே. முல்லைப் பெரியாறு பிரச்சனையில் கேரளாவிற்கு ஆதரவாகவும், தென் பெண்ணையாற்று பிரச்சனையில் கர்நாடகாவிற்கு ஆதரவாகவும் இதே போன்றொரு தீர்மானம் தமிழக அமைச்சரவையில் நிறைவேற்றப்படலாம். இதை தடுக்கவேண்டுமென்றால் இன்றே நாம் போராடும் மக்களுக்கு ஆதரவு கொடுக்கவேண்டும், இல்லையென்றால் நாளை நம் மீது வன்முறை ஏவப்படும் பொழுது நமக்கு ஆதரவு கொடுக்க யாரும் இருக்கமாட்டார்கள்.

                           மூன்று ஆண்டுகளுக்கு முன்னர் நடைபெற்ற முள்ளிவாய்க்கால் பேரிழப்பிற்கான நீதிக்காக போராடி வரும் நாம் நம் கண்முன்னே கூடங்குளம் மக்கள் சிறை வைக்கப்பட்டிருப்பதையும், குழந்தைகளுக்கான பால் கூட உள்ளே செல்லமுடியாமல் தடுக்கப்பட்டிருப்பதையும் கண்டும் காணாமல் இருக்கப்போகின்றோமா? அம்மக்களுக்கு ஆதரவாக களம் இறங்கப்போகின்றோமா? இல்லை ஐ.நா போன்றதொரு அமைப்பு கூடங்குளத்தில் நடைபெற்று வரும் இந்த அடக்குமுறையை விசாரித்த பிறகோ, சேனல் 4 போன்ற செய்தி நிறுவனங்கள் இது குறித்த ஒரு ஆவணப்படத்தை ஒளிபரப்பிய பின்னரோ ஒடுக்கப்பட்டவர்களுக்கு நீதிகேட்டு மட்டும் நாம் போராடப் போகின்றோமா?

“எமது நிலத்தைக்
காக்கும் இந்த போராட்டத்தில்
நாம் வென்றாக வேண்டும்
இல்லையேல்
நாம்
கொல்லப்படுவோம்
ஏனெனில் தப்பியோடுவதற்கு
எமக்கு வேறு நிலங்களில்லை”…… கென் சரோ விவா 

கூடங்குளம் நிலவரம் காலை 11.25

உதயகுமார் அவர்களின் பள்ளிக்கூடம், கணிப்பொறி, பள்ளி பேருந்து போன்றவை அடித்து நொறுக்கப்பட்டுள்ளன. நேற்றிலிருந்தே குடிநீர், உணவு போன்றவை கூடங்குளத்திற்குள்ளே செல்வது காவல்துறையால் தடுக்கப்பட்டுள்ளதால், உணவு, குடிநீர் தட்டுப்பாடு ஏற்பட்டுள்ளது. மக்கள் காட்டு வழி, கடற்கரையோர வழிகள் மூலமாக அருகிலுள்ள கிராமங்களுக்கு சென்று உணவுப் பொருட்களை சேகரித்து வருகின்றார்கள். மேலும் குழந்தைகளுக்கு தேவையான பால் தட்டுப்பாடும் ஏற்பட்டுள்ளது.

மேலும் மருந்து பொருட்கள் கையிருப்பும் குறைந்துள்ளது. இந்த நிலையில் ஒரு கர்ப்பிணி பெண்ணிற்கு வலி ஏற்பட, ஒரு வயதானவருக்கு சில மருந்து தேவை ஏற்பட இவர்கள் இருவரும் அப்பகுதியை விட்டு மருத்துவமனைக்குச் செல்ல அனுமதிக்கப்படவில்லை.

ஊடகங்கள் இன்று இடிந்தகரை பகுதியினுள் அனுமதிக்கப்படவில்லை.

அதிகமான பெண் காவல்துறையினர் விஜயாபுரம் பகுதியில் வந்து குவிந்து கொண்டே உள்ளனர்.

– நற்றமிழன்.ப, சேவ் தமிழ்சு இயக்கம் (Save Tamils Movement)

இக்கட்டுரை கீற்று இணையதளத்தில் முன்னரே வெளிவந்துள்ளது.

நன்றி – கீற்று.

அணுகழிவும், மன்மோகன் சிங்கும் ஒன்று தான், வேறல்ல….


                                                 

                 சில ஆண்டுகளுக்கு முன் மும்பையில் நான் பங்குகொண்ட ஒரு நிகழ்ச்சியில் அருந்ததி ராய் இக்கேள்வியை பார்வையாளர்களை நோக்கி கேட்டார் அல்லது ஒரு இந்தி செய்யுளிலிருந்து சில குறிப்புகளை கூறினார். மன்மோகன் கடந்த சில ஆண்டுகளாக செய்து வருவது என்ன? நஞ்சு நம் இரத்தத்தில் கலந்து பிறகு என்ன செய்யும்?

 எந்த சூழ்நிலையில் அவர் இக்கருத்தை கூறினார் என்பது ஞாபகமில்லை. ஆனால் கடந்த சில வாரங்களாக மன்மோகன் செய்யும் செயல்களுக்கு இக்கருத்து சரியான விளக்கமாகும். பெரும்பாலானோரின் பார்வைப்படி  “ஒரு பொம்மைப் பிரதமர்”, “மௌனீ”, ”பயந்தவர்”, ”உறுதியில்லாதவர்” என்று கருதப்படும் மன்மோகன் சிங் சில பிரச்சனையிலோ தனது வாழ்வையே பணயமாக வைக்கத்துணிந்துவிடுகின்றார். ஆனால் அந்த சில பிரச்சனைகளால் பாதிக்கப்படுபவர்கள் யார் என்பது தான் மிகக்கடினமான கேள்வி?

 கடந்த முறை இந்திய- வட-அமெரிக்க அணு ஒப்பந்தம் 2008ல் பாராளுமன்றத்தால் ஏற்றுக்கொள்ளப்படமால் இருந்தால் பிரதமர் பதவியிலிருந்து விலகுவதாக தன் முதுகெலும்பு பலம் மொத்தத்தையும் திரட்டி ஒருகட்டுரை எழுதினார். பெரும்பான்மையான பாராளுமன்ற உறுப்பினர்கள் அந்த ஒப்பந்தத்தை ஏற்றுக்கொள்ளாத பொழுதிலும் அவர் அந்த ஒப்பந்தத்தை வலிய பாராளுமன்றத்தில் திணித்து ஒப்புக்கொள்ளவைத்தார் ( இந்திய மக்களின் தலையில் ஊடகங்களால் திணிக்கப்பட்டு அதிக எதிர்பார்ப்பை ஏற்படுத்தியதாக கருதப்படும் ஒர் ஒப்பந்தம்). அணு ஒப்பந்தத்தின் மீது நடந்த நம்பிக்கையில்லா தீர்மானித்தின் மீது ஓட்டளிப்பதற்காக பணம் கொடுக்கப்பட்ட ஊழலைப் பற்றி நாமெல்லோரும் நன்கறிவோம்.

                       இந்த முறை மீண்டும் அதே அணு உலை ஆதரவிற்காக மன்மோகன் தனது நாவையும், முதுகெலும்பையும் மீண்டும் கண்டுபிடித்துள்ளார். ஆம், வடஅமெரிக்க நாளிதழான “Science”ற்கு அளித்த பேட்டியில் கூடங்குளம் அணு உலைக்கு எதிராக நடக்கும் போராட்டம் வட அமெரிக்க, ஐரோப்பிய நாடுகளில் உள்ள அரசு சாரா அமைப்புகள் கொடுக்கும் நிதியுதவியினால் நடக்கின்றது என்ற வித்தியாசமான(அமெரிக்காவுக்கு எதிரான)! குற்றச்சாட்டை வைத்துள்ளார்.   

                                           அரசு சாரா அமைப்புகள் தங்களுக்கு வெளிநாட்டிலிருந்து வரும் நிதியை அணு உலைக்கு எதிரான போராட்டத்திற்கு கொடுத்திருந்தால் அது தொடர்பாக வெளிநாட்டு நிதி ஒழுங்காற்று சட்டத்தின் அடிப்படையில் நடவடிக்கை எடுத்திருக்கவேண்டும். ஆனால் இது தான் இங்கு முக்கிய பிரச்சனையா?. மன்மோகன் சிங் வெளிநாட்டு நிதி என்ற குற்றச்சாட்டின் மூலம் மிகவும் குள்ளநரித்தனமாக செயல்பட்டு இங்கு முக்கியமாக விவாதிக்கப்பட வேண்டிய பிரச்சனைகளான கூடங்குளம் அணு உலைக்கான செலவு, பாதுகாப்பு, சுதந்திரமான அணு உலை ஒழுங்காற்று ஆணையம் இல்லாதது போன்றவற்றிலிருந்து பிரச்சனையே இல்லாத அரசு சாரா அமைப்புகளிலிருந்து வரும் வெளிநாட்டு நிதியின் பக்கம் திருப்பி விட்டுவிட்டார்.

                     கூடங்குளம் அணு உலைக்கு எதிரான போராட்டம் வெளிநாட்டு நிதியுதவியின் மூலம் நடக்கின்றதா? அல்லது அணு உலை ஆதரவு வழக்கறிஞர்களான – மன்மோகன்சிங், அரசா? யார் இங்கே உண்மையான வெளிநாட்டவர்கள்? அணு உலையை கட்டுவது இரசியர்கள். அணு உலைக்கு தேவையான எரிபொருளை(யுரேனியம்) கொடுக்கப்போவது வெளிநாட்டவர்கள், மன்மோகன் சிங் போட்ட ஒப்பந்தத்தின் மூலம் வட அமெரிக்கா கூட யுரேனியம் கொடுக்கக்கூடும். அணு உலை எதிர்ப்பு போராட்டத்தை விமர்சிக்கும் மன்மோகன் சிங் தான் சந்தேகமின்றி இந்திய வரலாற்றிலேயே அந்நிய நிதி- அந்நிய ஆதரவு பிரதமராவார்.

                           பிரதமர் ”வெளிநாட்டிலிருந்து நிதி” வாங்குகின்றார்கள் என்று யாரைக் குற்றம் சாட்டுகின்றார்? கூடங்குளம் அணு உலையை எதிர்க்கும் போராட்டக்காரர்களை. யார் இவர்கள்? மீனவர்கள், விவசாயிகள், சிறிய கடைகளை நடத்துபவர்கள், தலித் தொழிலாளர்கள், பீடி சுற்றும் பெண்கள், கூடங்குளம், இடிந்த கரை பகுதியைச் சேர்ந்த மக்கள். மீனவர்களும், தொழிலாளர்களும் தங்களால் இயன்ற சிறிய பங்களிப்பைக் கொண்டே இந்த எளிமையான அமைதிவழி போராட்டத்தை நடத்த இயலும். இப்போராட்டத்திற்கு அவர்களுக்கு பெரிய அளவிலான பணம் தேவையுமில்லை, ஏனென்றால் இது அவர்களது வாழ்வா, சாவா பற்றிய பிரச்சனை.

                 ஒரு விவாதத்திற்காக இந்த போராட்டத்தை நடத்த வெளிநாட்டு நிதி வந்துள்ளது என்று வைத்துக்கொண்டால் கூட அது இப்போராட்டத்தை சட்டத்திற்கெதிரான ஒன்றாக மாற்றிவிடுமா என்ன? அணு உலைக்கு ஆதரவாகவும், அரசுக்கு ஆதரவாகவும் பிரச்சாரம் செய்வதற்காக ஊடகங்களுக்கு பல கோடி ரூபாய்களை அரசு தன்னிடம் உள்ள முழு கையிருப்பையும் கொண்டு ஒதுக்கிவருகின்றது. இதில் எங்கும் சட்டப்பிரச்சனை வருவதேயில்லை. அதே சமயம் பண பலமும், அரசியல் பலமும் கொண்ட நிறுவன அரசை(Corporate State) எதிர்த்து போராடுவதற்கு  இந்தியாவிலிருந்தோ, வெளிநாட்டிலிருந்தோ கிடைக்கும் நிதி ஆதரவை  ஏழை கூடங்குளம் கிராம மக்கள் பெறுவது மட்டும் தவறு என்பது எந்த வகையில் நியாயம்?.

                          மேற்கூறிய வாதங்களை நான் வைக்கின்ற பொழுதிலும், மன்மோகன் சிங் தான் கூறிய ”வெளிநாட்டு நிதி” என்ற குற்றச்சாட்டை உறுதி செய்யும் எந்த வித ஆதாரத்தையும் இதுவரை முன்வைக்கவேயில்லை. இப்பொழுது மன்மோகன் சிங்கின் வழியை பின்தொடர்ந்து ஜெய்தாப்பூரில் அணு உலை கட்டுவதை எதிர்த்து போராடுபவர்களுக்கு வெளிநாட்டு நிதிவருகின்றதென்ற ஆதாரமற்ற குற்றச்சாட்டை மகாராஷ்டிராவின் காங்கிரசு அரசும் வைத்துள்ளது.

                              யார் ஒழுக்கமானவர்கள் என்று தான் மட்டுமே கூறவேண்டும் என்ற அரசின் எண்ணம், பலத்தை தான் மட்டுமே உபயோகப்படுத்த முடியும் என்ற எண்ணத்தைப் போன்றதே. “தேசிய நலன்” என்ற வாதத்தின் மூலமாக மேற்கூறிய இரண்டு அதிகாரங்களையும் அரசு மட்டுமே பிரயோகித்துவருகின்றது. அதே போல ”தேசபக்தி” என்பது எந்த ஒரு பகுத்தறிவுமின்றி உணர்ச்சிபூர்வமாக அரசு சொல்வதற்கெல்லாம் தலையாட்டுவதில் சென்று முடிகின்றது. வன்முறையை பிரயோகிக்கும் போராட்டங்கள் எல்லாம் மாவோயிசம், தீவிரவாதம், பிரிவினைவாதம் என்ற காரணத்தினால் இந்திய அரசு செய்யும் குற்றங்கள் எல்லாம் எந்தவித கேள்வியுமின்றி தள்ளுபடி செய்யப்படுகின்றன. அது போலவே பெரிய நிறுவனங்களை பயமுறுத்தும் அமைதிவழி போராட்டங்கள் எல்லாம் வெளிநாட்டு நிதி என்ற குற்றச்சாட்டின் கீழ் இந்தியாவிற்கு எதிரானவை என்பதால் இவையும் எவ்வித கேள்வியும் இன்றி தள்ளுபடி செய்யப்படுகின்றன. தேசபக்தி என்ற வாதத்திற்கு முன்னால் வாதாட யாருக்கு தைரியமிருக்கின்றது?

                                     ஆனால் இங்கு தேசபக்தி என்பது மிகவும் வித்தியாசமான, தெளிவற்ற நிலையிலேயே உள்ளது.. இந்த தேசபக்தி  வெளிநாட்டு பணம் அல்லது அந்நிய நேரடி முதலீடு இல்லாமல் இந்தியாவால் வளரமுடியாது என்று நம்பி, மான்சாண்டோ போன்ற நிறுவனங்கள் மூலமாக அந்நிய முதலீட்டை வரவேற்கின்றது ஆனால் அதே மான்சாண்டோவை எதிர்த்து போராட அரசு அல்லாத அமைப்புகள் அதே வெளிநாடுகளிலிருந்து நிதி ஆதரவு கொடுத்தால் தேடுதல் வேட்டையையும் நடத்துகின்றது.

                   மன்மோகன் சிங்கை “தூய்மையானவராக” காட்டுவதற்கு இங்கே நிறைய செயல்கள் நடக்கின்றன. ஆனால் உண்மையில் மன்மோகன் சிங் ஆ.ராசாவிடமிருந்தோ, மது கோடாவிடமிருந்தோ வேறுபட்டவரே அல்ல. ஒரே வித்தியாசம் என்னவென்றால் இவர் செய்யும் ஊழலுக்கு இவர் பணம் வாங்குவதில்லை. மன்மோகன் செய்யும் ஊழல் என்பது தன்னுடைய அரசியல் முதலாளிக்காக வளைந்துகொடுத்து  அரசு செயல்படும் முறையையே மாற்றுவதாகும். பேராசையினாலோ, அதிகார ஆசையினாலோ ஒருவர் செய்யும் ஊழலைவிட இந்த வகையான ஊழல் மிகக்கொடியதும், மன்னிக்கமுடியாததுமாகும்.

                              மன்மோகன் பொருளாதார அமைச்சராக அவதாரம் எடுத்த பொழுது கொண்டு வந்த தாராளமயமாக்கல் இருபதே ஆண்டுகளில் உலகின் மிகப்பெரிய மக்களாட்சியை, ஒரு வாழைப்பழ குடியரசாக மாற்றிவிட்டது. இங்கே சில குண்டர்கள் கருத்துரிமையை கொலை செய்துவிட்டு மிக எளிதாக தப்பிக்கமுடியும், ஆனால் அரசு சொல்வதை மறுத்து அமைதியான முறையில் போராட்டம் செய்யவோ, கருத்து வெளியிடவதற்கோ இங்கும் கொஞ்சம் கூட இடமில்லை. இந்திய அரசும், அந்நிய முதலீடும், இந்தியாவினுள்ளே இருக்கும் மன்மோகன் சிங்கின் உதவியும் இந்த வேலையை கட்சிதமாக செய்து முடித்துவிட்டன. உள்ளே கலந்து விட்ட நஞ்சும் அதன் வேலையை பார்க்கத்தொடங்கிவிட்டது.

மூலப்பதிவு: http://www.dnaindia.com/analysis/column_how-is-manmohan-singh-different-from-nuclear-waste_1657714

மூலப்பதிவை எழுதியவர் – sampath@dnaindia.net

மொழியாக்கம் – நற்றமிழன்.ப

%d bloggers like this: